Qntal - Am Morgen Frou LYRICS

"Der Mai ist mit allen Kräften gekommen,

die Blumen spriessen, die Vögel singen.

Es ist wie im Himmelreich.

Was ist da schöner als eine liebliche Frau?"



So die bluomen ūz dem grase dringent,

same si lachen gegen der spilden sunnen,

in einem meien an dem morgen fruo,

und diu kleinen vogellīn wol singent

in ir besten wīse, die si kunnen,

waz wünne mac sich dā gelīchen zuo?

es ist wol halb ein himelrīche.

suln wir sprechen, waz sich deme gelīche,

so sage ich, waz mir dicke baz

in mīnen ougen hāt getān,

und taete ouch noch, gesaehe ich daz.



Swā ein edeliu schoene frowe reine,

wol gekleidet unde wol gebunden,

dur kurzewīle zuo vil linten gāt,

hovelīchen hohgemuot, niht eine,

umbe sehende ein wenig under stunden,

alsam den sunne gegen der sterne stāt,

der meie bringe uns al sīn wunder,

waz ist dā so wünneclīches under,

als ir vil minneclīcher lip?

wir lāzen allen bluomen stān,

und kapfen an daz werde wīp.



Nū wol dan, welt ir die wārheit schouwen!

gen wir zuo des meien hohgezite!

der ist mit aller sīner krefte komen.

seht an in und seht an schoene frouwen,

wederz ir daz ander überstrīte;

daz bezzer spil, ob ich daz hān genomen.

owe der mich dā wellen hieze,

deich daz eine dur daz ander lieze,

wie rehte schiere ich dannne kür!

her meie, ir müeset merze sīn,

e ich min frowen dā verlür.



[Text: Walther von der Vogelweide]